Ævintýrin um Basil fursta komu fyrst út á Íslandi 1939-1941 í þremur þykkum bókum. Útgefandi var Sögusafn heimilanna en þeirri útgáfu stýrði upphaflega Árni Ólafsson.

Basil fursti kom svo út í fjölmörgum heftum allt fram undir 1970, en hvert hefti er sjálfstæð, spennandi og skemmtileg saga. Ævintýri þessi gerast víða um heim, til dæmis í Englandi, Þýskalandi, Bandaríkjunum og Indlandi. Vestfirska forlaginu finnst rétt að kalla furstann nú upp á dekk þar sem mottó hans er sigur hins góða yfir hinu illa. Svo geta menn í kaupbæti lært þéringar af furstanum, en hann þérar alla, háa sem lága.

Höfundur Basil fursta var lengi vel ókunnur, en nú eru menn sammála um að danski rithöfundurinn Niels Gustav Meyn hafi skrifað flestar ef ekki allar sögurnar um Basil fursta.

Hafið þér lesið Basil fursta?